ක්ෂණික ඇමතුම් : 0777 - 77-10-64

ORDER ONLINE (අන්තර්ජාලය හරහා ඇණවුම් කිරීම)

SPECIAL ANNOUNCEMENT  (විශේෂ දැනුම්වත් කිරීම්)


රටක ජාතික ආරක්ෂාව සේ ම එරටට ආහාර සුරක්ෂිතතාව ද අත්‍යවශ්‍ය ය. විවිධ අවි ආයුධවලින් හා සන්නද්ධ ආක්‍රමණවලින් රටක් ජාතියක් විනාශ කළ හැකිවා සේම "ආහාර" නම් ජීව අවියෙන් ද රටක් හා ජාතියක් විනාශ කළ හැකි ය. ජනතාව පරිභෝජනය කරන ආහාර සියල්ලක් ම පාහේ ජාන විකෘති කර ඇත්නම්, වස-විස මුසුකර ඇත්නම්, වෙනත් විවිධ ක්‍රම මගින් දූෂණය කර ඇත්නම් එම ආහාර පරිභෝජනයට ගන්නා පාරිභෝගිකයන්ට අත්වන්නේ ද අකල් මරණයකි.

වස විස සහිත ආහාර යනු ජාතියක් විනාශ කරන ජීව අවියකි. 
වර්තමානයේ අප රටේ මිලියන විසි දෙකක් පමණ වූ ජනගයනයෙන් සාතිශය බහුතරයක් පෙළෙන මාරාන්තික රෝග සමූහකට ප්‍රමුඛත ම හේතුව ඉහත ආකාරයෙන් දූෂ්‍ය වූ ආහාර පරිභෝජනය කිරීමේ වැරැදි රටාවකට ගොදුරුව සිටීමයි. 

රටකට එහි පුරවැසියන් සම්පතක් වීමට නම් ඔවුන් කායිකව මෙන්ම මානසිකව ද යහපත් නීරෝගීතාවකින් සිටිය යුතු වන්නේය. එවිට අප ඔවුන් රටේ මානව සම්පත ලෙස විග්‍රහ කරගන්නෙමු. 

එහෙත් රටක පුරවැසියන්ගෙන් බහුතරයක් රෝගීන් බවට පත්වී රටට බරක් වී ඇත් නම් එම පුරවැසියන් එම රටට මානව සම්පතක් නොව මානව විපතකි. 

භෞතික සම්පත් කෙතරම් යහපත් වුවද පුරවැසි සමූහය සම්පතක් නොවන්නේ නම් එවැනි රටකට අනාගතයක් නැත. හෘදයාබාධ, දියවැඩියාව, වකුගඩු විනාශවීම ආදී බොහෝ රෝගවලට මූලික හේතුව දූෂ්‍ය වූ ආහාර පරිභෝජන රටාව  නම් එය වෙනස් කළ යුතු ය. සෞඛ්‍ය සම්පන්න, දූෂ්‍ය නොවූ ආහාර පරිභෝජන සංස්කෘතියකට ජනතාව යොමු කිරීම  මේ මොහොතේ  අනිවාර්ය වී ඇත්තේ එනිසා ය.


ඔබ, අප ගෙවමින් සිටින මේ යුගයේ අප හමුවේ ඇති ප්‍රමුඛත ම අභියෝගය නම් මෙම තත්ත්වයට සංවිධානාත්මකව මුහුණ දීමයි. ගුණාත්මකබවින් තොරවූ විදේශ පිටිවර්ගවලින් වෙළඳසැල් සහ ආහාර ගබඩා පිරී තිබුණත් එය ජාතික ආහාර සුරක්ෂිතතාව නොවේ. 

එමෙන්ම වර්තමානයේ මෙරට සිදුකෙරෙන සහල් ඇතුළු මූලික ආහාරවර්ග නිෂ්පාදනය හා බෙදාහැරීමේ ක්‍රමවේදය ද අතිශයින් ම දූෂිත තත්ත්වයට පත්ව ඇත. ගොවියා ලවා සහල්, එළවළු, පළතුරු ආදිය වස-විස යොදා නිෂ්පාදනය කරන අතර ම ධීවරයින් ලවා කල්තබාගැනීමේ උපක්‍රම වශයෙන් මත්ස්‍ය නිෂ්පාදනවලට ද විවිධ වස-විස එකතු කරනු ලබයි. එමෙන් ම ගොවියා සහ ධීවරවා නිෂ්පාදනය කරන මූලික ආහාර සියල්ල ම හුදු ලාභය ම අරමුණු කොටගත් නරුම වෙළඳපොළ ආර්ථික ක්‍රමයේ ගොදුරු බවට පත්ව ඇත. මෙහිදී ගොවියා සහ ධීවරයා දැඩි සූරාකෑමකට ලක්කර ඇති අතර ම එම ආහාර පරිභෝජනය කරන පාරිභෝගිකයා ද එවැනි ම මංකොල්ලකෑමකට ගොදුරුව සිටී. මෙම දෙපාර්ශවය ම එවැනි තත්ත්වයකට පත්කර ඇත්තේ  අතරමැදි කෑදර, ධනවත් සුළුතර පිරිසක් විසිනි. මෙම පිරිසට බහුජාතික සමාගම් සේම සුපිරි වෙළඳසැල් ජාවාරම්කාරයින් ද ඉහළින් ම සම්බන්ධ වී සිටිති.

සියලු මූලික ආහාර වර්ග සඳහා මිනිස් පරිභෝජනයට නුසුදුසු තරමේ වස-විස විවිධ අයුරින් එක් කර පවතී. නිෂ්පාදනය සඳහා ද, කල්තබාගැනීම සඳහා ද, රසය ඇති කිරීම සඳහා ද, ඉවත් කළ පෝෂණ කොටස් එක් කිරීම් වශයෙන් ද, ජාන වෙනස්කිරීම් ලෙස ද එහි ප්‍රධාන අංශ කිහිපයක් පවතියි.
නිෂ්පාදකයා ද, පාරිභෝගිකයා ද සුළුතර අතරමැදි වෙළඳුන් පිරිසක් විසින් දැඩි ලෙස සූරාකෑමකට, මංකොල්ලයකට ගොදුරු කර ඇත.

අප රටේ සොබාදාහම  කෘෂි සහ ධීවර කර්මාන්තයට යෝග්‍ය වන ආකාරයට නිර්මාණය වී ඇතත් ඒ මත පදනම්වූ ස්වදේශික නිෂෟපාදන සහිත ජාතික ආර්ථිකයක් නිර්මාණය කිරීමට තවමත් අප අසමත් වී සිටිමු. අතීත හෙළයින් එම පදනම මත සැබෑ ලෙස ම කටයුතු  කළ නිසා එදා අප රට පෙරදිග ස්වයංපෝෂිත සංවර්ධිත රාජ්‍යයක් බවට පත්විණි.

එහෙත් අද අප රට මුළුමනින් ම පරපෝෂිත රාජ්‍යයක් ලෙස පරිහාණිය කරා වේගයෙන් ගමන් කරමින් ඇත. මැදපෙරදිග වහල් සේවයට ගිය අපගේ ගෘහණියන් නොසිටියේ නම් අප රට මෙපමණ මට්ටමකින්වත් ඉතිරි නොවනු ඇත. 

ජාතියක් වශයෙන් අප මුහුණ දෙමින් සිටින තත්ත්වය මෙබඳු නම් මෙම අවාසනාවන්ත ඉරණමින් නිදහස් වීම නොපමාව කළ යුත්තක් බවට පත්ව ඇත. මෙම මව් පොළොවේ සුජාතයින් වන අපි පළමුව කළ යුත්තේ අප කවුරුදැයි ගැඹුරු ලෙස හඳුනාගැනීම ය. එහි දී අප අතීතයේ දී මෙම මව් පොළොව ස්වයංපෝෂිත කළ නිවහල් හෙළයා සොයාගත යුතු ව ඇත. ඔහු විසින් අත්පත්කොටගෙන සිටි ශක්තීන් කවරේදැයි හඳුනාගත යුතුව ඇත. අපගේ ආහාර සංස්කෘතියෙහි වත්මන් විකෘතිය වෙනුවට අතීත ප්‍රකෘතිය පැහැදිළි කරගත යුතුව ඇත. එලෙස ක්‍රියා කිරීම මගින් සැබෑ හෙළයෙකු අප තුළ ද නිර්මාණය කරගත හැකිවනු ඇත. මේ තීරණාත්මක මොහොතේ මාතෘ භූමිය විසින් ඉල්ලා සිටිනුයේ බෙලහීන හෙළයෙකු නොව ශක්තිමත් හෙළයෙකි
එන්න
හදමු බලවත් හෙළයෙක් ................
ගොඩනගමු බලවත් හෙළයක්............